Dili, 05-07 Novembru 2024: Fokupers servisu kooperasaun ho Sekretaria Estadu Igualidade (SEI) realiza treinamentu kona-ba estabelese mekanízmu referál Violénsia Bajeia ba Jéneru (VBJ) ba lideransa komunitária ba suku haat (4) hanesan, Comoro, Bairu-Pite, Cameia no Lahane-Osidental iha Munisipiu Dili. Ne’ebé realiza iha Salaun Marfin, Fokupers, Farol.
Objetivu husi treinamentu ne’e mak, hasa’e koñesimentu membru konsellu suku sira kona-ba Igualidade Jéneru no Violénsia bazeia ba Jéneru iha nivel suku. Harii no Estabelese mekanizmu rede referal iha nivel suku hodi bele halo prevensaun ba violénsia kontra feto no labarik feto. Treina individual idak-idak atu bele sensivel liu-tan ba asuntu jéneru hahú husi sira nia família, komunidade no sosiedade liu-liu iha fatin servisu.
Fokupers hetan fiar husi Sekretaria Estadu Igualidade (SEI) ba implementa atividade ne’e, hodi haforsa koodenasaun no mekanizmu referal VBJ ne’ebé efetivu hodi asegura impelementasaun pilar II PAN-VBJ.
Tuir Diretóra Ezekutiva Fokupers, Sra. Domingas Afonso Amaral, hateten, Treinamentu ida ne’e, parseira entre Fokupers ho Sekretaria Estadu Igualdade (SEI), ne’ebé mak fó apoiu fundus transferensia publiku nian tinan 2024 ba organizasaun Fokupers, atu realiza treinamentu sira hanesan ne’e, ba Xefe suku sira, liuliu ba estrutura suku, ita nia alvu suku 8 iha Dili.
Diretóra Ezekutiva Fokupers, dehan, Objetivu husi treinamentu ne’e mak, atu reforsa rede referal iha nivel suku, tanba estrutura suku nia papel importante mós atu bele prevene no responde ba asuntu Violénsia Bazeia ba Jéneru.
“Hau hanoin treinamentu ne’e importante atu Xefe suku sira ho nia estrutura tomak bele eleva liu-tan sira nia koñesimentu, liuliu asuntu oinsa atu halo prevensaun no responde ba VBJ iha ita-boot sira nia suku.
Agradese ba Xefe suku ho nia estrutura nia prezensa, deseija katak, treinamentu ne’e bele lao efetivu liu tan.
“Hau deseija katak, ita hotu aproveita tempu loron tolu ne’e ho di’ak, no efetivu liutan, nune’e bainhira fila husi fatin ida ne’e, bele lori netik mensajen ruma atu bele hatutan no habelar liu-tan iha komunidade, importante liu-tan atu dezenvolve iha suku no kontribui hapara VBJ iha komunidade.”
Treinamentu ne’e faze dahuluk, durante loron 3, no faze segundu nian, sei hala’o iha inisiu fulan Dezembru 2024,
Iha Abertura treinamentu, Diretóra Nasionál Polítika Iguldade Jéneru (DNPIJ)-SEI, Sra. Celeste Ramos Martins Gonçalves, hateten, fiar katak, ita-boot sira ne’ebé eleitu bazeia ba konfiansa husi povu, no konfiansa ne’ebé ita-boot sira hatudu ba povu sira iha aldeia no suku. Nune’e ajuda tebes estadu, liuhusi SEI bele haree kona-ba oinsa atu bele hatur loloos no prevene fó protesaun ne’ebé apropriadu ba ita-nia vitima vulneravel sira liuliu Vitima VBJ.
Diretóra DNPIJ-SEI, akresenta, ita presija estabelese mekanizmu referal VBJ ba lideransa komunitaria husi suku ualu (8) iha Munisipiu Dili, ita presija ida ne’e, haree ba padraun hatur ona entre SEI, MSSI no mós ho nia parseiru sira tomak iha ita-nia governu. Ita nia mekanizmu rede referal ida ne’e, atu bele asegura no garantia oinsa ita-nia servisu ne’ebé integradu entre lideransa komunitária no sosiedade sivil, Governu hanesan SEI no MSSI, VPU ho Ministeriu sira seluk.
Sra. Celeste Ramos Martins Gonçalves, esplika, haree kona-ba ita nia intervensaun sira, lideransa komunitária mak besik liu sosiedade sira, ho ida ne’e mak funsionamentu mekanizmu rede referal hodi asegura no garantia oinsa ita nia servisu integradu entre ita-boot sira ho entidade relevantes ne’ebé mak hatutr ona iha livru Planu Asaun Nasional-Violénsia Bazeia ba Jéneru (PAN-VBJ), sai hanesan pakote lei Nú 7/2010 Lei kontra Violénsia Doméstika (LKVD). Ho ita-boot sira ne’ebé tuteladu ba Ministeriu Administrasaun Estatal (MAE) ita nia livru ne’e rasik mós oinsa responsavél husi MAE, atu responsabilidade ba implementasaun VBJ.
“Hau fiar katak, ita-boot sira partisipa treinamentu durante loron tolu ne’e, ho objetivu, intensaun ida molok sai husi ne’e, ba fali ita-boot sira nia knár fatin oinsa bele atende didi’ak ba problema ne’ebé mak sai polemika iha ita-nia rai laran, liuliu iha Dili.” Garante Diretóra DNPIJ-SEI, Sra. Celeste Ramos Martins Gonçalves.
Iha Fatin hanesan, Partisipante Xefe Suku Comoro, Sr. Eligio José da Silva Marçal, Agradese ba Fokupers ne’ebé servisu hamutuk ho SEI hodi realiza treinamentu ida ne’e, tanba treinamentu ne’e importante tebes ba lider komunitária sira hodi komprende didi’ak, wainhira mosu kazu ruma iha suku, oinsa lider komunitária nia papel atu rezolve ka fó solusaun ba violénsia ne’ebé mosu iha komunidade.
“Ami kontente no agradese tebes ba konvite ne’ebé fó mai ami, hodi partisipa treinamentu ida ne’e, nu’udar Xefe suku Comoro, hau foin primeira-vez partisipa treinamentu sira hanesan ne’e, hau orgullu tebes partisipa treinamentu ne’e, nune’e bele loke ami lideransa komunitária nia koñesimentu oinsa papel ami nian, bainhira mosu kazu VBJ iha ami nia komunidade, oinsa atu rezolve no refere kazu VBJ.”
Sr. Eligio José da Silva Marçal, dehan, Durante loron tolu (3) ne’e aprende kona-ba, saida mak Violénsia Bajeia ba Jéneru, Tipu Violénsia, Igualdade Jéneru, mekanizmu rede referal, oinsa halo prevensaun ba VBJ no asédiu seksuál, Enkuadramentu legál, Counseling, komunikasaun atendimentu vitima no seluk tan, ho materia sira ne’e, hasa’e ami nia koñesimentu hodi aplika iha suku, no aldeia.
Xefe Suku Comoro, husu ba Fokupers, treinamentu sira hanesan ne’e, tenki iha nia kontinuasaun, bele tun direita ba suku no aldeia sira, nune’e komunidade sira mós bele komprende didi’ak, bainhira mosu kazu Violénsia ba feto no labarik feto, sira mós iha ona koñesimentu bele ba keixa, no sira mós brani koalia sai.
Partisipantes ba treinamentu ne’e mak, Xefe suku, xefe aldeia, xefe juventude, delegadu/a no lia-na’in.
