Violénsia ba Feto kontinua buras iha ita rai. Okupasaun hotu, maibe kanek sira seidauk maran. Kanek sira seluk mosu tan. Feto nafatin mak sai vitima ba violénsia.
Relatóriu Chega rejista feto liu atus ualu (800) hetan ona violasaun seksual durante tempu okupasaun iha tinan 1975-1999.
Depois de ukun, Situasaun violénsia sei kontinua hafalun feto no no labarik-feto nia moris. 33% feto ho idade 15-49 esperiénsia ona violénsia hosi sira-nia parseiru moris. Ne’e signifika feto na’in 1 entre na’in 3 hetan violénsia iha nia moris. Violénsia ne’e la’os de’it akontese ba feto adultu, maibe feto hasoru violénsia hahu kedas husi bainhira sei labarik. Iha dadus DHS hatudu mos 66% feto hetan ona esperiénsia abuzu fíziku, no 24% feto hetan esperiénsia abuzu seksuál bainhira sei labarik. Organizasaun fornesedor servisu asistensia ba feto no Labarik-feto sira, inklui polisia VPU – Loron-loron simu keixa no fó asistensia ba feto no labarik-feto sira ne’ebé sai vítima ba violénsia bazeia ba jéneru. Tinan 5 nia laran, Fokupers rejista total kazu 557 Violénsia doméstika – hasoru fen no 301 kazu violénsia seksuál hasoru fetono labarik-feto.
Durante tinan 5 ne’e nia laran , Feto na’in 5 mate Violénsia doméstika- violénsia husi laen no labarik-feto ida mate tanba violénsia seksual no violénsia fiziku iha uma laran. Violénaia hasoru feto no labarik-feto kontinua as!! Retratu sira ne’e hatudu momoos situasaun problema sosial boot ne’ebé todan iha feto nia moris.
Liu husi meiu ida ne’e, iha ambitu kampaña loron 16 ativizmu kontra violénsia hasoru feto no labarik-feto, Fokupers bolu nafatin ita hotu-hotu nia atensaun atu ita hotu hamutuk halo mudansa ba Timor-Leste ida ne’ebé hakribi violénsia hasoru feto no labarik-feto. Ita hotu nia responsabilidade hodi halo asaun kiik ne’ebé bele kontribui ba Paz iha família, sosiedade no nasaun hodi hatete no halo hamutuk mudansa:
• Hamutuk ba mudansa: liuhusi muda liafuan, atetude no hahalok ne’ebé suporta violénsia
• Hamutuk ba mudansa: Kumpre vítima sira-nia direitu, hodi asegura vítima sira iha asesu lalais no adekuadu ba servisu rekuperasaun, akompañamentu legál no justisa.
• Hamutuk ba Mudansa: Hapara impunidade, ejize responsabilidade ba autor violénsia sira
• Hamutuk ba Mudansa: estabelese toleránsia zero ba violénsia hasoru feto no labarik-feto sira.
• Hamutuk ba Mudansa: Halo investimentu ho seriedade iha pervensaun no responde sedu ba violénsia
Tanba
Feto moris laiha diskrimasaun no violénsia mak sei kontribui ba família nia haksolok no saudavel
Feto nia moris laiha violénsia sei kontrubui ba komunidade no sosiedade moris iha aarmonia no dame
Feto nia moris laiha violénsia mak hatudu loloos ita-niafiar ne’ebé sai ita-nia kultura
Feto nia moris laiha violénsia mak sei hamenus taxa mortalidade inan ne’ebé la’os kauza husi moras loloos no hamenus gastus orsamentu estadu ba tratamentu saúde .
Feto nia moris laiha violénsia mak sei hametin ekonomia família no nasaun
Feto nia moris laiha violénsia mak atinji loloos nasaun ne’ebé moris iha igualdade no respeita direitus umanus
Feto nia moris laiha violénsia mak sei hatuur aliserse ne’ebé metin iha família , komunidade , sosiedade no nasaun
Ajenda Fokupers iha kampaña Loron 16 ativizmu kontra violénsia hasoru feto no labarik-feto:
25 Novembru 2024: Lansamentu kampaña violénsia hasoru feto mak forma violasaun direitu umanu
liuhusi lansa plataforma foun website Fokupers: fokupers.org
26 Novembru 2024: Mensajen Proteje feto no labarik-feto husi VBJ, hafasil asesu ba rekuperasaun no
justisa ba vitima VBJ iha facebook
27 Novembru 2024 : Konferensia Imprensa
28 Novembru 2024: Proklama hamutuk “Chega ba violénsia bazeia ba jéneru” liuhusi facebook
29 Novembru 2024: Loron Internasionál ba Defensor Direitus Umanus Feto (International day for women
human rights defender) – “Feto mak Futuru” – liuhusi facebook
1 Dezembru 2024: Loron AIDS International – Proteje feto-inan, feen no oan nia saude husi AIDS
2 Dezembru 2024: Loron International da Abolição Escravatura (mensajen husi facedbook FOkupers)
3 Dezembru 2024: Loron Internasional ba Ema ho Defisiensia – Seminar no Bazar “ Hamutuk ita prevene
no hapara violénsia hasoru feto liuhusi asegura feto nia direitu fundamental sira inklui
direitu b arai no proriedade
5 Dezembru 2024: Loron International ba Voluntariu mensajen iha facebook Fokupers
6 Dezembru 2024 : Loron Zero Toleránsia ba Violénsia hasoru Feto
7 Dezembru 2024 : Loron Invasaun- Mensajen pozitivu iha facebook Fokupers
9 Dezembru 2024: Human Rights Defenders day – Diálogu públiku ho foinsa’e Hamutuk ita prevene no
hapara violénsia hasoru feto hodi promove igualdade jéneru no asegura feto-nia
direitus umanus liuhusi empoderamentu ekonomia
10 Dezembru 2024: Kongresu Feto Nasional ba Daneen
Hamutuk ba Mudansa: Mai Hamutuk Prevene no Hapara Violénsia hasoru Feto no Labarik-feto
Fokupers, Dili 27 Novembru 2024
