𝐇𝐚𝐤𝐛𝐢𝐢𝐭 𝐅𝐞𝐭𝐨, 𝐇𝐚𝐤𝐨𝐭𝐮 𝐕𝐢𝐨𝐥𝐞́𝐧𝐬𝐢𝐚: 𝐃𝐢𝐚́𝐥𝐨𝐠𝐮 𝐢𝐝𝐚 𝐛𝐚 𝐌𝐮𝐝𝐚𝐧𝐬𝐚

Foto: Foinsa’e Agripino & Carolina

Iha tinan kotuk, loron 9 Dezembru 2024, Fokupers  orgullu  hamutuk ho World Vision Timor-Leste, realiza atividade Dialogu Públiku ho Tema “Hamutuk Ita Prevene no Hapara Violénsia Hasoru Feto Hodi Promove Igualidade Jéneru no Asegura Feto nia Direito Umanu Liu Husi Empoderamentu Ekonomia” hodi selebra kampaña loron 16 ativizmu Kontra Violénsia  hasoru feto no labarik feto.

Hafoin de remata Dialogu Publiku ne’e, joven sira sira senti haksolok, tanba bele hetan informasaun direita husi oradóres importante sira.

Foinsa’e Agripino ( 25) husi Youth Generation in Action

Tuir, Agripino ( 25) husi Youth Generation in Action, hatete, nia senti orgullu hodi partisipa atividade Dialogu Publiku ne’e, nune’e bele hetan informasaun direita husi oradóres sira, hanesan mane sempre apoiu inan feton sira hodi luta ba asuntu inkluzivu no igualdade jéneru.

 “Ha’u senti orgullu tebes partisipa ona iha dialogu públiku ida ne’e. Tanba kampaña loron 16 Ativizmu kontra Violénsia hasoru Feto no Labarik feto ne’e importante tebes. Durante semana rua ne’e ita fó onra ba feto sira nia luta no liuhusi dialogu públiku ne’e, ita akumula grupu juventude no organizasaun non governamentais sira.” Orgullu joven Agripino.

Agripino, hatutan, Buat ne’ebé nia hetan husi dialogu ne’e mak, hetan informasaun direta husi oradóres sira liuhusi dialogu ne’ebé interativu tebes. Ho tema “Feto nia papel hodi luta ba kombate Violénsia Hasoru feto no labarik feto ne’e, la’os buat fasil, maibé difisil tebes, no sira tau duni seriedade ba ida ne’e.” Nune’e mós liuhusi programa empoderamentu ekonomika ne’ebé Fokupers, World Vision no FEEO halo ne’e, hau hanoin katak, ida ne’e espasu ida atu bele empodera feto sira no hases feto sira husi violénsia oioin.”

“Ha’u hanesan mane ida, sempre apoiu ha’u nia inan feton sira, ita nia papel mak, sempre luta ba asuntu inkluzivu no Igualdade Jéneru. Grupu Youth Generation in action hanesan grupu ida ne’ebé nia ho komprimisu atu luta ba asuntu Igualdade Jéneru no Violénsia bazeia ba Jéneru, laiha pergunta atu luta oinsa, maibé  hau hanoin katak, feto ida nia susesu sura mós mane ida nia luta. Baibain ha’u sempre dehan iha sosiedade, uma laran no família, keta koko atu kria prizaun ida iha ita nia uma-laran, ita rasik tortura feto no labarik feto sira.”dehan, Joven Agripino.

Foinsa’e Carolina (24), husi Joven ba Kristu (JBK)

Iha fatin haesan, Carolina (24), husi Joven ba Kristu (JBK), dehan, “Buat ne’ebé hau aprende iha dialogu publiku ida ne’e mak, kona-ba violénsia hasoru feto no labarik feto. Ha’u senti kontenti loos, tanba ha’u nu’udar feto bele iha espasu atu partisipa, Dialogu ne’ebé foka ba Violénsia ne’ebé akontese ba feto no labarik feto sira.”

Violénsia ne’e mós la akontese de’it ba ita, maibé dalabarak liu mós akontese ba ema ho difisiensia. Nu’udar foinsa’e ne’ebé mak hetan oportunidade atu rona dialogu furak ida ne’e,  senti kontenti bele rona rasik husi oradores sira, sobrevivente Violénsia Bazeia ba Jéneru, sira nia esperiensia, nune’e mós esperiensia husi feto (Single mother), ne’e fanu tebes ami foinsa’e sira, hodi bele brani hamriik mesak, hakbiit nia-an ikus mai bele susesu.

“Nu’udar feto foinsa’e, buat ne’ebé hau hakarak implementa mak, hau hakarak hahú husi ha’u nia família, katak “Violénsia hasoru feto no labarik feto ne’e ita labele hanoin katak, ne’e hanesan problema baibain, ita tenki tau ida ne’e nu’udar problema públiku ida, ita tenki halo asaun. No feto nia servisu ne’e la’os iha dapur de’it no hamriik iha kotuk de’it, maibé feto mós bele hetan kareira ne’ebé di’ak hanesan mós mane.” hateten, foinsa’e Carolina.

Foinsa’e Carolina Husu ba Fokupers, FEEO no World Vision, labele para de’it halo atividade hanesan ne’e ho joven sira, maibé bele halo atividade sira hanesan ne’e, ba fali área rural sira, Governu no Eskola sira, tanba dalabarak violénsia sira akontese mós iha ne’eba.

Oradóres ba Dialogu Públiku ne’e mak, Diretóra Nasionál Politika Igualdade Jéneru-SEI Sra. Celeste Ramos Gonçalves, Programa Manajer ADTL Sra. Rosalia Teresa Pereira, No PNTL, Komandante Sra. Natersia Eufrasia Martins.

No iha mós sesaun Fahe esperiensia emprezarial nian husi Owner Skyra Coffee Sra. Vera  Juice, Diretór Ezekutivu Youth Empowerment for Future_”YEFF”, Sr. Domingos Pereira no Sra. Jualian hanesan Sobrevivente Violénsia Bajeia ba Jéneru koalia kona-ba istória susesu husi kampionatu feto iha empoderamentu ekonomia.

Atividade ne’e partisipantes hamutuk 260, feto 170 mane 76, Ema ho Difisiensia fizika 11 no Ema ho Difisiensia Matan 3.

Partisipantes sira ne’e mai husi, Sekretaria Estadu ba Igualdade (SEI), Uniaun Europeia, SERVE,IP, BNCTL, PNTL, JSMP, Fundasaun Alola, ALFeLa, ACbit, ADTL, AHMDTL, RHTO, AHISAUN, Yayasan Humanis, CNJTL, The Asia Fundation (TAF), RYLA, CVTL, CNJTL, Autoridade lokál, EIROS, Joven ba Kristo (JBK), Youth Generation in Action, skyra coffee shop, Youth Empowerment for Future_”YEFF”, estudantes Universitáriu sira hanesan, UNTL, IOB, UCT, UNDIL, UNPAZ no seluk tan.

Projetu POWER  finansia hosi Uniaun Europeia (UE) no implementa husi World Vision, FOKUPERS no FEEO, iha Oe-cusse no Covalima, hodi apoia Promove Feto Liuhusi Empoderamentu Ekonómia no Direitu.