Hasoru Amada, Feto Ativista. 

Maria Madalena do Carmo “Amada” feto aktivista ida, nia feto ida ne’ebe servisu ba iha areia violensia bazeia ba jeneru, tan ne’e nia envolve a’an iha aktividades oi-oin hanesan partisipa iha programa sira ne’ebe halao iha nia suku, halao advokasia ba ita nia feto maluk sira no enkoraja atu halo denunsia ba problema ne’ebe feto sira hasoru.

Aktividade sira ne’ebe nia halo hetan suporta masimu husi autoridade lokal sira, membro  KPK, no nia grupo feto maluk sira, OPS no mos Membro Rede referal sira hanesan  MSS, PRADET, ALFLA, VPU, OXFAM. Alem de ida ne’e Amada mos hetan apoio Maximu husi ninia familia, nia familia la fo difikulta ba nia servisu no sira sempre fo oportunidade no tempu ba nia maske dala ruma nia tenki halao servisu iha loron sabdo no domingo. Familia sempre enkoraja nia hodi implementa aktividade sira ne’e to’o rohan, atu nune’e komunidade bele tau konfiansa ba nia servisu rasik.

Wainhira nia halao servisu sira ne’e, nia sempre tau konfiansa ba nia a’an rasik  tamba nia iha konhesimentu ne’ebe naton ba aktividades ne’ebe atu implementa, nia iha ligasaun no linha de komunikasaun ne’ebe efetivu ho parseiru sira hotu.

aktividade sira ne’e nia halao ona maibe nafatin iha difikuldade, dala ruma maluk feto sira la involve a’an iha aktividade ho maximu tamba la hetan oportunidade tamba sira nia parseiru rasik la fo tempu ka aturizasaun ba sira. Maneira ne’ebe nia uza hodi resolve difikuldade hirak ne’e maka: nia rasik kria soru mutu ho maluk mane sira liu husi konselhu do suku, para kria enkontru regular ho mane sira, atu nune’e sira bele aturiza ka fo tempo ba feto sira hodi envolve a’an iha aktividade hirak ne’e.

lia menon husi Mana Amada: atu labele habaruk a’an estuda maibe buka atu hakas a’an hodi envolve a’an iha aspeito hotu, nune’e ita hotu bele hola parte atu bele ukun nasaun ida ne’e, tan wainhira baruk ten mak ita rasik sei kria officina ba diabo nian.