Lensa Fokupers; Fokupers halo audiensia ho Sua Excia Sekretaria Estadu ba Igualdade (SEI), Sra. Elvina Sousa Carvalho.
Dili, 27 Janeiru 2025; Fokupers kompostu husi Diretóra Sra Domingas Afonso Amaral, DML sra. Rosa Maria de Sousa, Koordenadóra Advokasia Sra. Natalia de Jesus Cesaltino no Staff Advokasia Maria Monalisa Marçal, halo audiensia ho Sua Excia Sekretaria Estadu ba Igualdade (SEI), Sra. Elvina Sousa Carvalho.
Objetivu audiensia; apresenta atividade Fokupers iha finalizasaun peskiza ida kona-ba Feto nia Direitu ba Rai no sei realiza kolokiu lansamentu relatóriu peskiza kona-ba “Asesu ba justisa Rai no Propriedade ba Sobrevivente Violénsia Bazeia ba Jéneru (VBJ) iha Timor-Leste”.
Oportunidade ne’e Fokupers konvida Sua Ex.cia SEI hato’o mensagen xave no halo abertura ba iha kolokiu no lansamentu relatoriu ne’ebe previstu iha data 07 Fevereiru 2025 no mós hola parte nu’udar Oradóra ba iha kolokiu ne’ebé sei realiza iha data mensiona.
Intervensaun Diretóra Fokupers, Sra. Domingas Afonso Amaral, agradese ba Sua Excia SEI ninia disponibilidade tomak ho laran luak simu Fokupers nia prezensa hodi hato’o objetivu ne’ebe mensiona iha leten ho nia prosesu tomak iha inisiu hakerek no dezenvolve peskiza, ida ne’e hanesan meius advokasia atu feto sobrevivente VBJ sira hetan sira nia direitu ba rai no propriedade. Iha avansu tinan 2024 Fokupers konsegue realiza Diskusaun Meja Redonda dala ida hodi rona ema hotu nia prespektiva kona-ba direitu sira ne’ebé konsta iha Enkuadramentu Legál sira relasiona ho feto Sobrevivente VBJ nia direitu ba rai. Ho rezultadu diskusaun sira maka Fokupers kontinua halo peskiza refere.
Diretóra mós aprezenta kontiúdu relatóriu peskiza ne’ebé kobre de’it iha Munisipiu 9 ne’ebé mak forte ho kultura matrilinear no patrilinear no iha deskobrimentu lubuk ida ne’ebé liga liu ba feto sobrevivente VBJ ho esperiensia lubuk ida ne’ebe durante ne’e Fokupers akompaña, rona no fó asistensia ba feto maluk vitima VBJ bainhira sira sai vitima ba violénsia domestika.
Lensa Fokupers: Hafoin de remata enkontru, Ekipa Fokupers foto hamutuk ho SEI
Fokupers apresia tebes ba Sua Excia SEI nu’udar makinaria estadu ne’ebé halo dadauk ona advokasia iha nivel altu hodi asegura komprimisu jéneru Estadu nian liu husi asegura abordagem jneru iha linha ministeriais sira liga ho asuntu : Revizaun Lei kontra violensia domestika, Revizaun ba lei trabalhadores domestikus, feto sobrevivnete VBJ nia asesu ba rai no propriedade, asesu ba formasaun inklui asesu ba kampu de servisu iha rai liur.
Ikus agradese ba Sua Excia nia rekoñesimentu ba esforsu tomak ne’ebé Fokupers halo iha inisia grupu traballu hakerek LKVD to’o iha prosesu revizaun ba lei ne’e rasik.
