Dili, 03 Dezembru 2024; Iha Ambitu kampaña loron 16 Ativizmu kontra Violénsia hasoru Feto, maka Fokupers realiza Semináriu no Bazar ho tema “Hamutuk ita prevene no hapara violénsia hasoru Feto liu husi asegura Feto nia direito fundamental sira inklui direitu ba Rai no Propriedade”, atividade ne’e hala’o iha edifisiu Fokupers, Farol.
Objetivu husi atividade ne’e mak, Governu nia komprimisu hodi asegura feto nia direitu moris iha ekonomia ne’ebé sustentavél no politika Governu hodi hapara volénsia hasoru feto no labarik feto, Hasa’e ema hotu nia koñesimentu atu apoia ekonomia Feto sira liu-liu sobevivente no ema vulneravel sira atu asegura espasu/rai atu feto sira bele halo negosiu. Fó oportunidade ba feto sobrevivente sira ne’ebé iha negosiu bele promove no fa’an sira nia produtu. Halibur hamutuk no fó oportunidade ba feto sobrevivente sira hodi kria rede ho feto maluk sobrevivente sira seluk, governu, emprezaria lokál, negosiante ki’ik sira no konsumidores sira hotu. No Fó espasu ba feto sobrevivente sira hodi fahe esperensia atu nune’e bele hasa’e komunidade sira nia konsiensia kona-ba impaktu violénsia bazeia ba jéneru.
Tuir Prezidente Konsellu Kuradór, Sra. Maria Domingas Fernandes Alves, hateten, Loron hirak nia laran, hahú kedas iha 25 Novembru hahú kampaña loron 16 ativizmu kontra Violénsia hasoru feto, no Fokupers nia misaun ho Vizaun boot dezde uluk kedas hakarak koko kore korenti ida ne’ebé kontinua akontese lorloron iha sosiedade, agora ita rejista barak, tanba ema komesa hetan konsiensia katak, Violénsia ne’e krime, bazeia ba lei kontra violénsia Domestika, ne’ebé aprova iha 2010, no iha mós planu asaun anuál, ita iha mós konvesaun lubuk ida, estadu ratifika CEDAW, ita halo relatóriu beibeik ona.
“Ita lalika koalia barak, maibé tenki halo asaun mak barak, ita hein katak, Sekretaria Estadu ba Igualdade (SEI), sai nafatin ita nia parseiru ida di’ak, hanesan parte ida husi Governu ho hein mós katak, Parlamentu Nasional ho Prezidente Republika bele sensivél liu ba Violasaun kontra Feto.” Dehan, Prezidente Konsellu Kuradór.
Sra. Maria Domingas Fernandes Alves (Micato), reafirma, Aat liu agora mak, Violasaun Seksuál, ita hanoin iha tempu Indonesia mak ema halo violasaun ba feto liuliu violasaun seksuál, maibé realidade iha uma laran mós violasaun seksuál kontinua iha, tanba ne’e mai ita hamutuk rona oradóres sira nia prespektiva, ita hein katak, violénsia ne’e bele para.
“Hau agradese ba oradóres sira, hau hein katak, ita hotu-hotu, liuliu ba feto sobrevivente ne’ebé fa’an iha atividade bazar ne’e, atu rona didi’ak oradór husi BNCTL, oinsa mak ita bele hetan oportunidade hetan kreditu ruma atu hasa’e sobrevivente sira nia vida ekonomika, ita la’os koalia de’it oinsa atu kombate Violénsia kontra feto, ita opta ba justisa ida di’ak liu ba Timor-Leste, maibé ita mós hakarak hadia ekonomikamente feto maluk sira nian. Hein katak, ita hotu bele liberta aan, labele sai beibeik sobrevivente mais ita mós bele halo mudansa ba ita nia moris.” Tenik Prezidente Konsellu Fokupers.
Iha Fatin hanesan, Reprezentante Sekretária Estadu ba Igualdade (SEI), Diretór Jerál , Sr. Armando da Costa, akrsenta, Apresiasaun ba Fokupers ho nia parseiru sira ne’ebé suporta Fokupers hodi realiza atividade Semináriu no Bazar, ne’ebé hatudu komitmentu Forte tebes hahú kedas iha tinan 1978 to’o agora, signifika iha komitmentu no vontade boot servisu iha area ida ne’e, espesialmente iha area responde no prevene violénsia hasoru feto no labarik feto.
Diretór Jerál SEI, hatutan, Atividade ne’e realiza iha ambitu kampaña loron 16 ativizmu kontra violénsia hasoru feto no labarik feto, SEI mós halo atividade lubuk ida ita hala’o, no ita lansa iha 25 Novembru iha fatin-fatin no ita espera katak, sei kontribui direita ba iha prevene violénsia hasoru feto no labarik feto no lori ita ba iha servisu ne’ebé pronto responde ba iha sobrevivente sira husi Violénsia bajeia ba Jéneru.
Nia realsa tan katak, Iha planu Asaun Nasional Kontra violénsia hasoru feto no labarik feto, hatur iha ne’eba pillar tolu, maibé iha pillar boot ida mak koalia kona-ba prevensaun ninian. Tanba ne’e durante kampaña loron 16 Ativizmu ne’e parte husi atividade sira ne’ebé kontribui ba iha prevensaun ninian, espera ho atividade sira ne’ebé lubuk ida, iha kontextu prevensaun nian, bele kontribui ba iha mudansa atetude, pensamentu, atu la halo kualker violénsia hasoru feto no labarik feto.
Iha Pillar segundu, ita hatene katak, Fokupers didika nia-an servisu iha area responde ba kazu sira no problema sira ho violénsia hasoru feto no labarik feto. Entaun ida ne’e sai komitmentu no obrigasaun ita hotu nian, nune’e mós estadu Timor-Leste nafatin firme iha atividade sira no programa sira, politika.
Diretór Jerál SEI, Apresia ba feira/bazar ne’e, fó espasu ba maluk sobrevivente sira, atu bele espresa sira nia kretaividade, nune’e ho ita nia kontribuisaun bele kontribui ba rendimentu balun, ba iha sira nia moris familia ninian.
Reprezentante Country Director Oxfam iha Timor-Leste, Sr. Florencio de Oliveira, deklara, Implementasaun projetu feto no rai, ho ninia durasaun ba tinan lima (5), ne’ebé hahú husi tinan 2020-2025, iha prosesu revizaun ba OXFAM ninia estratejia país, 2015-2020 hatudu katak, impaktu limitadu ba asuntu jéneru, presija iha nesesidade ba dezenvolvimentu abordajen sira, no iha rekoñesimentu foku espesikamente ba asuntu igualdade jéneru.
Objetivu husi projetu feto no rai antisipa ona mak feto no grupu sira seluk ne’ebé hasoru dadaun marzenilizasaun sai aumenta liu-tan sira nia rejilensia moris di’ak bem-estar no ajensia bainhira hasoru kolpasu ba dezastre klimatiku sira.
Primeiru, Saida mak projetu feto no sei halo atu fortifika feto sira nia direitu ba rai, uluk lei no politika, programa sira ne’ebé proteje feto sira nia direitu ba rai. Segundu mak sosiál inkluzivu liu ba feto sira nia direitu ba rai. Enjerál atu hateten katak, mane sira iha fornese iha direitu, ne’ebé forte liu atu hetan eransa ba rai, kontrolu ne’ebé forte liu ba rai iha sira nia uma-kain, familia no komunidade. Sira nia votus ne’ebé forte liu iha nivel espesifiku iha prosesu foti desizaun asuntu rai.
Datolu, aumenta feto sira nia abilidade atu advoka sira nia direitu halo desizaun kona-ba sira nia rai. Dahaat, Organizasaun Sosiedade Sivil sira, sustentavél no advoga feto sira nia direitu ba rai, organizasaun sira kona-ba direitu rai nian halo ona servisu balun kona-ba asuntu feto integra asuntu jéneru nian ba sira nia advokasia, ba lei no politika sira tan sira nia peskiza no monitórizasaun politika no evikasaun, maibé sira falta komprensaun no estratejia ida kourente kona-ba asuntu feto sira nia rai no ema balun de’it maka servisu organizasaun setór ida-idak mak iha komprensaun kle’an kona-ba asuntu Jéneru nian.
Sr. Florencio de Oliveira, hateten, Atividade Seminariu no Bazar ne’e, Oxfam agradese tebes ba Fokupers ne’ebé mak organiza atividade ne’e, espera katak, husi atividade refere, panelista sira mós sei fahe informasaun ba ita, relasiona ho progresu situasaun atuál ne’ebé ita iha, no mós liuhusi feira produtu ne’ebé mak iha bele aumenta no haforsa sobrevivente sira nia rendimentu ba iha produtu sira ne’ebé iha.
Nia akresenta, Realiza katak, parte hotu tenki tau importansia no seriedade ba iha asuntu feto nia direitu ba rai, direitamente kontribui mós ba iha prevensaun no redusaun violénsia bajeia ba Jéneru, tanba rai mak sai sentru ba buat hotu,
Oradóres ba Semináriu ne’e mak, Diretór Jerál SEI, Sr. Armando da Costa, Jurista Advokasia Dra Adelina Meluk de Jesus Lobo, Gerente Kreditu BNCTL, Sra. Zeneti Herminia Fernandes, CEO of East Timor Trading Group, Sra. Milena Pires no Diretóra Ezekutiva Fokupers.
Partisipantes sira mai husi, Diretóra Nasionál Polítika Igualdade Jéneru-SEI, Provedória-Adjunta Direitus Humanus (PDHJ), Kedutaan Besar Republik Indonesia (KBRI), BNCTL, OXFAM, The Asia Fundation (TAF), CNJTL, ACBIT, ALFeLa, Casa Vida, Pradet, Pro-Ema, KAEBAUK, Reprezentante Embaixadór Nova Zelandia, HAK, AJAR, Codiva, AFJTL, Jurista Advokasia, Yayasan Humanis, Autóridade Lokál, UNTL, no seluk tan.
Atividade ne’e hetan apoiu Fundus husi OXFAM.
