Manatuto, 3-5 Outobru 2024, Fokupers realiza Treinamentu kona-ba Auditória Sosiál ho Prespetiva Jéneru ba Komunidade Edukativu, Diretóres Eskola, Lider Komunitariu, Professores, Estudantes no mós Organizasaun Sosiedade Sivil sira. Ne’ebé hala’o iha salaun CNE Manatuto ho total partisipante ema na’in 25 (feto 19 – mane 6).
Objetivu husi treinamentu ne’e mak, atu hasa’e ema nia koñesimentu kona-ba Boa Governasaun liu husi Auditória Sosiál ho Perspetiva Jéneru, no atu partisipante sira iha konsiénsia hodi responde, prevene violénsia Bazeia ba jéneru (VBJ) iha nível eskola.
Parte seluk husi objetivu ne’e, atu komunidade edukativu husi eskola 3 hanesan, EBC Laydoe, EBC-Cribas, ESG- Kayrala, bele iha sensibilidade kona-ba asuntu violénsia bazeia ba jéneru (VBJ) no sai autór ba mudansa iha sira nia Munisipiu inklui iha eskola sira.
Treinamentu ne’e importante tebes, atu partisipantes sira uza ho di’ak materia sira ne’ebé fornese hodi tau iha prátika ne’ebé laiha diferensa entre feto no mane iha moris sosial, kultura no familia nia laran. oinsa deskobre aktus violénsia ne’ebé akontese iha familia, komunidade no sosiedade nia laran.
Iha ambitu treinamentu, partisipantes sira dezeña ai-hun problema, hodi haree Tipu Violénsia, nia kauza, no abut. Hafoin de sira dezeña ai-hun sira desobre katak, violénsia mosu tanba dezigualdade jéneru no kultura ne’ebé fó kbiit ba mane sira foti desizaun.
No Importansia seluk husi treinamentu ne’e, partisipantes sira sai na’in ba Auditória Sosiál nu’udar prosesu ida ne’ebé apoia sidadaun sira hodi monitóriza Governu nia servisu hodi garante desenvolvimentu nasionál fó benefisiu ba ema hotu no mantein diálogu ho parte interesada sira husi komunidade, sosiedade sivil no Governu hodi fahe opiniaun kona-ba Governu nia prestasaun servisu.
Partisipante sira mós dezeña mapamentu hodi haree ba potensia rekursus ne’ebé iha, desafius, no problema sosiál sira, liu-liu liga ho infrastutura, fasilidade saneamentu bee-moos, fasilidades publiku sira ne’ebé mak eziste iha Munisipio Manatuto, hodi sai hanesan rekomendasaun ba Governu ba implementasaun programa ka projetu sira hodi identifika asaun ne’ebé nesesáriu atu hadi’a di’ak liu prestasaun servisu sira ba iha Boa-Governasaun, hatene halo advokasia hodi garante katak, Orsamentu Geral Estadu (OGE) bele fó benefisio no ema hotu-hotu, liu-liu feto sira hola parte iha dezenvolvimentu Nasional.
Treinamentu refere, hetan partisipasaun husi, Diretór Eskola husi, EBC Laydoe, EBC-Cribas, ESG- Kayrala, Lideransa Komunitaria, Sosiedade Sivil, Assosiasaun Feto Manatuto (AFEMA), CNJTL no Estudantes sira.
Atividade ne’e hetan apoiu Fundus husi Governu liuhusi Gabinete Apoio Sosiedade Sivil (GASC).
