Mery Bareto Profile

Sra. MARIA GORUMALI BARRETO, babain kuñesidu ho naran Mery, oan husi Sr.Paulo Loe Nunes no Sra. Isabel Dau Nunes. Sra Mery  oan ba da-ualo (8) Husi bin alin nain sia (9).  Sra Mery moris iha Ritabou-Maliana, iha loron 03 Juñu 1973. Sra Mery ninia estudu hahu husi SD II Ritabou , Pre-secondaria iha eskola SMPN II Maliana, nomos Secondariu iha eskola SMAN I Maliana, kontinua estudu iha Universitas Timor-Timur (atual Universidade Nasional Timor-Leste), Fakuldade Agrikultura.

Iha tinan 1997 Sra. Mery nudar estudante nomos ativista ne’ebe ativu tebes iha luta ba Ukun rasik-an, iha tinan 1997, Sra. Mery hamutuk ho Ativista Direitus Umanus  nain 15 organiza Workshop ida kona-ba Saude Reprodutiva feto, hafoin workshop ne’e remata sira hamutuk  funda organizasaun sosiedade sivil ida ho naran Forum Komunikasaun Perempuan Timor-Leste ( FOKUPERS ).  Nudar fundadores Fokupers, atividades lubun barak maka Sra. Mery ho kolegas sira halao hodi haburas, haforsa no hametin Fokupers. Sra. Mery ativa tebes involve a’an iha qualker atividades nudar ativista feto Timor-Leste. Sra. Mery haknaar a’an nudar diretora ezekutiva Fokupers durante periodu 2010 to’o  2012. Hafoin mandatu nudar diretora remata, Sra. Mery kontinua servisu nudar jerente programa advokasia iha Fundasaun Alola durante fulan sanulu resin ida (11), hahu husi fulan Abril 2013 to’o Marsu  2014.  Alende haknaar a’an nudar jerente, Sra. Mery nafatin fo ninia kontribuisaun moral nudar membru no fundador Fokupers, liu-liu nafatin hetan fiar husi Asembleia Jeral Fokupers nian, eleitu nudar Presidente Konselhu Fiskais iha periodu 2017 to’o 2021. Provileziu boot ne’ebé Sra. Mery hasoru, maibe mos nudar responsabilidade boot ne’ebé nia simu tanba ninia abilidade nomos responsabilidade, maka hetan fiar husi Primeiru Ministru Sr. Kayrala Xanana Gusmão iha mandatu V Governu Konstituisional, nudar Komisaria Nasional Direitu Labarik iha periodu 2014 to’o 2018. Sra Mery ho vontade tomak, nomos responsabilidade maksimu luta ba direitu labarik Timor-Leste nia Futuro durante tinan ha’at (4) hafoin husik nini kargu nudar komisariu iha loron 01 Juñu 2018. Nudar militantes partidu CNRT Sra Mery halao ninia komprimisiu politik ne’ebe forsa tebes-tebes, tanba ne’e maka Sra Mery hetan fiar husi diresaun partidu CNRT nomos apoiantes partidu CNRT Munisipiu Bobonaro, maka agora dadaun hetan fiar husi povu sai nudar Representante povu iha Uma Fukun Parlamentu Nasional periodu 2018-2023. Parabens  mana  Mery, kontinua misaun Feto no Labarik iha ajenda Parlamentu Nasional !!!