SELEBRASAUN LORON INTERNASIONAL BA FETO, SEGUNDA, 8 MARSU 2021
Tinan-tinan Nasoens Unidas Komemora loron espesial ida ne’e nu’udar Loron Internasional ba FETO hodi marka kontinuamente ka halo advokasia atu luta ba promosaun no igualdade de Jéneru, hanesan Feto iha lideransa, Feto iha tomada de Desizaun Polítika to’o fali divisaun ekitativa, hanesan iha servisu uma-laran ka doméstiku entre Feto no Mane, hodi kontinua Luta kontra forma Violasaun hoto-hotu hasoru Feto, hanesan, violénsia doméstika, violasaun seksual, incestu, pedofilia to assédiu seksual nu’udar koroláriu ida ne’ebé konstantemente Feto tomak iha mundo halo Luta Comum ba Objetivu Comum.
Loron Internasional ba Feto nu’udar data ka loron ida ne’ebé marka ona iha istória no hetan rekoñesimentu hosi ONU nu’udar loron ne’ebé Feto no aktivista sira ba Igualdade uza hodi halo protestus kontra desigualdade hahú hosi sistema patriarcal no pratikas kulturais, sosiais no polítikas ne’ebé sei mantein ka konserva status quo, hodi halo FETO nu’udar ema subordina ka númeru dois. Iha loron ida ne’e mak Nasaun sira kontinua halo advokasia ka luta ba Igualdade de Jéneru. ONU iha tinan 1975, ofisializa loron 8 fulan Marsu nu’udar Loron Internasional ba Feto, ne’e katak hahú sékulu 20 (vinte) rai hotu-hotu komemora ona loron ida ne’e.
Timor-Leste iha tempu ne’eba, hafoin Repúblika Demokrátika de Timor-Leste deklara ona nia Independénsia Unilateral iha 28 de Novembro 1975 ne’ebé DECRETA hosi COMITÉ CENTRAL FRETILIN no PROKLAMA husi nia PRESIDENTE, hahú kedas iha Base de Apoiu Resisténsia Luta ba Ukun rasik-aan; OPMT (Organizasaun Popular Mulher Timor) nu’udar Organizasaun ba massas Frente Revolucionária Timor-Leste (FRETILIN), hahú komemora kedas iha Loron 8 fulan Marsu 1976, hodi enkuadra partisipasaun Feto Timor iha Revolusaun. Ho objektivu prinsipal ba partisipasaun Feto ho nia emansipaun, atu assegura triunfo ka vitória ba Ukun Rasik-aan, tenke inklui libertasaun Feto nian enkuantu ser ka ema sosial, ne’ebé alvu ba dupla explorasaun; hosi konseitus, pratikas, estereotípus tradisionais no kulturais no konsepsaun seluk hosi rejime kolonial ne’ebé hanehan ba dala-rua, estatuto Feto Timor.
Hosi kedas objectivu prinsipal OPMT ne’ebé tenke hahú Luta ida Dupla, katak partisipa diretamente ba Luta kontra Colonialismo no ida mak tenke kombate meius no forma ba diskriminasaun violenta ne’ebé FETO Timor sai alvu iha sosiedade kolonizada ho prátikas kulturais no tradisionais ne’ebé sei metin no konservador, hodi hamenus feto nia partisipasaun iha vida sosial, polítika, ekonómika no kultural.
Ohin loron, ita moris ona iha Miléniu foun, iha tinan 2021, maibé Luta ba IGUALDADE DE JÉNERO sei kontinua nafatin, ho desafius foun, liliu iha era mídia sosial ne’ebé konkorridu tebes. Maske liu ona tinan 47 (hatnulu resin hitu), bainhira ONU ofisializa LORON INTERNASIONAL BA FETO no Timor-Leste mós nu’udar Estado de Direitu Democrátiku ne’ebé Restaura nia Independênsia liu tinan 19 (sanulu resin sia) mesmuké moris iha Conjuntura Polítika foun ho Estadu ida ne’ebé garante Direitu no Igualdade Sidadaun hotu-hotu nu’udar ESTADO de Direitu Constituional, maibé ita hotu sai sasin ba rejistu akontesimentu barak ne’ebé sei sai polémika iha mídia no públiku em jeral kona-ba violénsia baseia ba jéneru, violasaun seksual, incestu, pedofilia, pornografia no violénsia doméstika. Pontu pozitivu ida mak diskusaun ne’e hahú invade estrutura no kamada sosial barak, ne’e pontu pozitivu ida atu sai sasukat ba sensibilidade sosiedade ida nian. Mezmuké diskusaun hirak ne’e sei nakonu ho aproveitamentu no interesse terseirus, maibé ba FOKUPERS ne’e hatudu barómetru ida ekilibradu hodi hatu’ur iha hoto-hotu nia ibun, prátika no asaun, poder ba analiza kauza no impaktus hosi tipolojia violénsia hirak ne’e, no barak rekorre ba GOOGLE atu hatene liutan KONSEITU PEDOFILIA no INCESTU no seluk-seluk tan. Importante liu maka Diskusaun hirak ne’e sei kontinua iha prisma ida Diálogu abertu no franku ho interesse úniku maka oinsá esforsu Estadu liu hosi Governu garante duni polítika públikas ho instrumentus adekuadus ba resposta tuir Lejislasaun hirak ne’ebé vigora iha Timor-Leste no Sosiedade rasik esforsa-aan atu korrije ka hasees-aan hosi prátika no komportamentu nakonu ho formas estereotípos no prátikas kulturais no sosial ne’ebé patriarkal tebes kontra labarik no feto. Diálogu ka diskusaun refleksiva labele sai fali diskusaun antagónika, ho liafuan seluk timoroan sai fali inimigu ba malu, ho interesse tuir kór polítika, ka efeitu seluk ka parte terseiru, tamba LABARIK, FETO, VITIMA ka SOBREVIVENTES LABELE SAI nu’udar instrumentu ba buka PODER, BUKA ATENSAUN HO POPULARIDADE, BUKA INFLUENSIA POLÍTIKA no Buka SATISFASAUN KA KEPUASAAN individual ka Grupos. Ida ne’e mak sai ADVOKASIA ida EFIKAZ no FORTE iha Loron 8 fulan marsu 2021.
Aborda ba Tema Internasional ba tinan 2021: MULHERES NA LIDERANSA: ALCANÇANDO UM FUTURO IGUAL EM UM MUNDO DE COVID katak Feto iha Lideransa: hodi alkansa futuru ida hanesan ka igual iha mundu ho COVID. Iha nível Internasional de’it ita rejista katak Nasaun 20 (rua-nulu ) de’it mak lidera hosi Feto hanesan: Alemanha, Nova Zelándia, Dinamarka, Etiopia, Finlandia, Islandia, Estónia, Eslovaquia no tuir informasaun katak FETO hirak ne’e hetan mós susesu boot iha sira nia carreira polítika no sai duni Líder ida di’ak ho nível ne’ebé di’ak duni.
Relatório Parlamento Europea haktuir impacto ba feto durante pandemia Covid19 e aumento desigualdade de género; feto serviso barak liu iha linha frente hanesan: 95% feto serviso nu’udar cleaner iha linha frente, 76% feto iha profissional saúde, 93% feto sai professores e auxiliares de educação, 86% feto serviso iha cuidados de saúde privados e pessoais no 82% feto serviso iha kasir supermercados.
Iha Timor-Leste, ho polítika PLATAFORMA DE AKSAUN BA PRIMEIRU KONGRESSO FETO NIAN iha tinan 2000, hosi ORGANIZASAUN sira hanesan: OPMT, FOKUPERS, OMT, FETO SIRA IHA DIÁSPORA, GFFTL, ETWAVE, SAGRADA FAMÍLIA, FETO JURISTAS, FETO PROFISSIONAIS, PAS, UNFETIL, ISMAIC – CONGRAGAÇÕES RELIJIOSASAS. REPRESENTANTES HOSI 13 DISTRITOS/MUNISIPIOS, besik 1000 pessoas, ho apoiu polítiku hosi CNRT nu’udar Instituisaun ne’ebé reprezenta UNIDADE NASIONAL, UNTAET, Finansiadu hosi BANCO MUNDIAL ho apoiu mos husi OXFAM… nsst, mak halo advokasia hodi garante Direitu Constitusional hodi inklui Artigu 17 no 18 iha CRDL, KUOTA 30% ba partisipasaun FETO iha POLÍTKA no INSTITUISOENS PÚBLIKAS sira hoto, ratifika CEDAW, Lei Kontra Violénsia Doméstika ne’ebé hahú kedas prossessu iha I GOVERNO CONSTITUSIONAL no APROVA IHA IV GOVERNO CONSTITUSIONAL. FOKUPERS mak sai organizasaun ne’ebé halo parte iha Grupo Diskusaun hahú kedas ho Decreto do Concelho de Ministros iha I Governo Constitucional.
Ho rezultado hirak ne’e Feto sira sempre iha númeru ida ekuilibradu tuir kuota iha Governo, Parlamentu Nasional, iha Tribunal, Procuradoria, Defensoria Públika, Feto sira iha Cargos de Chefia iha Funsaun Públika, iha PNTL no Iha mos F-FDTL, hanesan mos Instituisaun do Estadu sira. Maske nune’e iha prosessu durante tinan 20 (rua nulu) nia laran sei rejista diskriminasaun barak no nia efeitus hanesan laiha ABILIDADE tamba de’it FETO. Maibé iha VIII GOVERNO CONSTITUCIONAL, FETO atinje ona lideransa iha nível VICE-PRIMEIRA MINISTRA, ne’e passo ida de’it ba FETO, no hein katak kestaun ida ne’e bele mantein atu bele atinje duni Igualdade de Oportunidade.
Iha COVID 19 nia laran , ita hotu rejista Feto barak iha linha da FRENTE no halo parte iha Sala de Situação hanesan: Ministra da Saúde, Diretora Geral, Médicas no Enfermeiras sira, hanesan mós profissionais da Saúde ne’ebé serviso iha Laboratórios, no empregadas de limpeza iha hospital, professoras sira iha Universidade to fali ensinu básiku iha sidade to fali fatin rural, funcionárias públicas no Agentes Administrasaun Pública, Feto maluk sira iha MÍDIA, Feto maluk sira iha F-FDTL, iha PNTL, Feto maluk sira iha Instituisoens Sosiedade Sivil, Feto maluk sira iha Ajénsias Internasionais, Madres ka Irmãs iha Confissoens Relijiosas, Feto maluk sira iha Emprezas Públikas, Empresárias no Pequena Indústria, Fila liman sira, Feto maluk sira iha servisu agrikultura, sira ne’ebé sai empregadas doméstikas, sira ne’ebé iha área rural no isoladas, feto maluk sira portador ba Defisiénsia Fízika ka Intelektual, Avó sira terseira idade, Inan sira guardadora iha uma, hotu-hotu hala’o hela sira nia knaar no responsabilidade hodi haktuir REGRAS de PREVENSAUN tuir Estadu Emerjénsia. Estadu de Emerjénsia ba dala XI, Feto sira koopera no tuir duni polítika do Estadu ba garante expansaun COVID 19 iha Timor-Leste, parcela MUNDO nian ne’ebé sofre PANDEMIA GLOBAL NO INTERNASIONAL ida.
FOKUPERS liu hosi BOLETIM ESPESIAL ba 8 de MARSO 2021, tuir TEMA INTERNASIONAL ida ne’e, bele hametin liu Komprimisu tuir MISSAUN FOKUPERS nian ho BASE ba CONSTITUISAUN RDTL, respeita Instrumentus Internasionais CEDAW, CONVENSAUN DIREITUS LABARIK nian, Leis no Lejislasaun Nasionais sira hotu, respeita EMA HOTU nia Dignidade Umana no Kontinuamente halo Refleksaun atu buka hadi’a liutan prátikas no SOP (Standar Operasional Produre) Fokupers nian iha ADVOKASIA, APOIU no PROTEKSAUN BA VÍTIMAS inkondisional, hasa’e koñesementu Labarik sira iha CRECHE ka KNUA LABARIK ho Objectivo NAUN VIOLÉNSIA, no Empoderamentu Ekonómiku ba FETO. Mai ita hoto Hamutuk LUTA BA SOSIEDADE IDA JUSTU LIU, ho IGUALDADE NO DEMOKRÁTIKU tebes.
Hakerek-na’in,
Sra. Maria Domingas Fernandes Alves ‘’Micato’’
Fundadora FOKUPERS