Fokupers hamutuk ho SEI realiza Diskusaun Meza Redonda kona-ba Feto Sobrevivente VBJ nia Asesu ba Justisa, Rai no Propriedade

Diskusaun Meza Redonda hela’o iha Salaun Delta Nova

Dili, 26 Jullu 2024: Fokupers servisu hamutuk ho Sekretária Estadu ba Igualdade (SEI), realiza Diskusaun Meza redonda ho tema “Feto Sobrevivente Violénsia Bazeia ba Jéneru (VBJ) nia Asesu ba Justisa, Rai no Propriedade: Desafius no Posibilidade iha Orsamentu Jeral do Estado”, hodi asegura komprimisu jéneru ba feto nia direitu iha Lei no Justisa.  Atividade ne’e realiza salaun Delta-Nova.

Objetivu husi Diskusaun ne’e mak, Aprezenta evidensia ba dezenvolve orsamentu Jeral estadu (OJE); Analiza desafius sira ba desizaun judisial liga ho asesu ba rai no propriedade ba sobrevivente violénsia bazeia ba Jéneru; Promove diskusaun no sensibiliza autór foti-desizaun kona-ba asesu ba Justisa, rai no propriedade ba sobrevivente VBJ.

Iha abertura ba diskusaun Meza Redonda,Sua Exelénsia Sekretária Estadu ba Igualdade (SEI), Sra. Elvina Sousa Carvalho, hateten, Diskusaun ne’e importante tebes hodi deskute no debate kona-ba asuntu ne’ebé esensiál tebes ba sidadaun no sidadánia Timor-Leste liuliu ba feto sira enjerál no feto sira hanesan sobrevivente violénsia bazeia jéneru nia asesu ba justisa, rai no propriedade.

Asegura feto nia asesu ba rai no propriedade ne’e fundamental tebes, tanba ida ne’e hanesan xave ba empoderamentu ekonomia no dezenvolvimentu feto nian.

“Sekarik feto laiha asesu ba rai no propriedade mak sei laiha justisa ba feto no feto sira sei laiha seguransa ba hela fatin hanesan uma no rendimentu. Hanesan ita hotu hatene katak feto maioria hela iha area rurál no moris hanesan agrikultora. Ne’e duni rai hanesan kapital ida importante tebes ba feto no mane sira atu sira jere hanesan rekursu produtivu ida atu prodús aihan no halo negósio hodi aumenta sira rendimentu nune’e feto sira bele hakonu sira nia nesidades sira hanesan hahan, edukasaun, saúde no nesidade báziku sira seluk,” hateten Sua Exelénsia SEI.

Sua Exelénsia mós afirma, Timor-Leste iha kompromisu bo’ot atu asegura direitu sidadaun tuir Konstituisaun RDTL artigu 54 garante ona katak, individu ida-idak iha direitu ba rai no propriedade privadu no bele transfere ba ema seluk tuir nia vontade no tuir lei no mós sidadaun no sidadán sira iha direitu na’in ba rai. Iha Lei Nú. 13/2017 kona-ba Rejime Espesiál ba Difinisaun Titularidade Bein Imovel nian iha artigu 4,  ne’ebé estipula klaramente katak, direitu propriedade ba bein imovel sei asegura ho kondisaun hanesan ba mane no feto, no bandu kualkér forma atu halo diskriminasaun ba titularidade, asesu, jestaun, administrasaun, gozu, transferénsia ka dispozisaun bein imovel nian.

Nune’e mós iha artigu 5, nian mós akresenta kona-ba dever hodi respeita grupu vulnerável sira nian. Katak, entidade sira-ne’ebé responsabiliza aplikasaun lei ida-ne’e iha obrigasaun atu respeita nesesidade espesiál grupu vulnerável sira-nian, no, ba efeitu ne’e, tenke foti medida hotu-hotu hodi garante informasaun adekuada, konsulta no partisipasaun hosi grupu sira- ne’e, nu’udar forma atu promove direitu igualdade no la iha diskriminasaun.

Ho Konstituisaun ne’ebé iha garantia tebes Direitu Sidadaun ida-idak kona ba Rai no Propriedade maibe ho Kultura Timor-Leste nian ne’ebé maioria domina hosi mane no fó favor liu ba mane sira mak atu sai na’in ba rai.

Sua Exelénsia dehan, husi inistiativa ba diskusaun meza redonda ne’ebé mak realiza hosi SEI no Fokupers importante tebes, atu ema hotu bele haree no diskute kona-ba knaar no responsablidade saida de’it mak instituisaun Estadu no Governu nian hanesan Sekretaria Estadu ba Terras no Propriedade, SEI, Defensória  Públiku no seluk tan bele hala’o no saida mak sosidade sivíl sira halo hodi asegura implementasaun lei ne’ebé  iha, atu nune’e feto no grupu vulnerável sira hotu inklui feto sobrevivente violénsia bazeia jéneru sira bele iha asesu ba rai no propriedade.

Sua Exelénsia Sekretária Estadu ba Igualdade Agradese ba Fokupers realiza ona Diskusaun refere no Sekretária Estadu ba Igualdade (SEI) mós kontinua nafatin buka hatemetin parseria ho parte hotu-hotu hodi halo sosializasaun ba lei sira ne’ebé mak relevante ba feto nia direitu ba rai no propriedade atu feto sobrevivente sira hosi VBJ mós moris dignu iha sosiedade no nasaun Timor-Leste.

Nune’e mós SEI kontinua halo advokasia no koordena ho entidade relevante sira atu asegura iha planu no orsamentu atu sira mós bele hala’o sira nia knaar sira tuir lei Haruka.

Diretora Ezekutiva Fokupers, Sra. Domingas Afonso Amaral, hato’o introdusaun ba Diskusaun meza redonda

Iha fatin hanesan, Diretóra Ezekutivu Fokupers, Sra.Domingas Afonso Amaral, hateten, objetivu husi Diskusaun Redonda ne’e mak atu hasae konsensia ema nia foti desizaun no parte interesanda katak, feto Violensia bazeia ba Jéneru hasoru dezafiu atu asesu ba Justisa no direitu ba propriedade no rai, Konsidera Evidensia sira ne’ebé iha nu’udar oportunidade ba planiamentu orsamentu Jerál Estadu nian ba tinan 2025 no futuru, hetan evidensia ne’ebe suporta fokupers nia peskiza tuir mai ne’ebe foka liu ba feto sobrevivente Violensia Bazeia ba Jéneru nia direitu ba Justisa , asesu ba rai no Propriedade.

“Objetivu husi Diskusaun meza Redonda ida ne’e mós atu aprezenta evidensia ba dezenvolvimentu Jerál Estadu, analiza dezafiu sir aba desizaun juridiku liga ba asesu rai no propriedade sobrevivente VBJ, promove diskusaun sensibiliza ator foti-disizaun kona-ba asesu ba Justisa Rai no Propriedade.” Dehan, Diretóra Ezekutiva Fokupers.

Iha Diskusaun Meza Redonda ne’e, hetan partisipasaun husi, Sekretaria Estadu ba Igualdade, S.E Sra. Elvina Sousa Carvalho, Sekretariu Terras no Propriedades, S.E Sr. Jaime Xavier Lopes, Prezidente GMPTL, Provedóra-Adjuta Direitus Humanus, Reprezentante Ministeriu Finansas-Diretór Nasional Orsamentu, marka prezensa móa husi parseiru save sira mak, DFAT, The Asia Fundation, UN Women, OXFAM, JSMP, ALFeLA, RHTO, JU’S, Jurista Advokasia, Rede ba Rai, Hivos, TAHAN, no mós Autóridade Lokál, seluk tan.

Atividade ne’e, hetan apoiu Fundus husi OXFAM