Atividade Loron Mundial ba Feto 2018
Loron 5-6 Marsu 2018, FOKUPERS hala’o ona treinamentu Trauma Healing ba Sobrevivente Violénsia Bazeia ba Jéneru. Treinamentu ne’e halao iha Salaun JSMP Manleuana. Total partisipantes hamutuk nain 14.
Objectivo husi treinamentu ida ne’e:
- Fahe esperensia ba malu, aprende husi maluk seluk nia esperiensia moruk
- Bele fó koragem, forsa ba malu hodi hakmaan sentimentu triste, tauk, trauma, lakon fiar
- Bele kura sentimentu kanek ne’ebé iha no bele hadomi liu tan an rasik
Rezultado husi treinamentu ida ne’e mak:
- Sobrevivente sira pinta sira ida-idak ninia mota moris ba malu. Sira mós bele fahe fali sira nia
mota moris iha grupo. - Sira sente kmaa’n Bainhira koalia sai ona sentimentu hotu ne’ebe sira iha.
- Harii konfiasa atu rona, fó forsa, aprende husi kolega seluk nia esperensia.
- Vitima sira hato’o sira sente kontente, toba diak, hetan forsa bainhira rona maluk seluk nia esperiensia.
Mensagem husi sobrevivente sira.
- Wainhira ita feto hasoru kaju sira hanesan ne’e, ita tenki brani atu kolia sai ba ema hotu liu-liu ba família sira, tamba laiha ema ida ke moris mesak.
- Quando ita hasoru problema ka violénsia husi ema ruma liu-liu mane sira, ita persija hato’o keisa hirak ne’e ba NGO sira ne’ebe servisu ba área ida ne’e, hanesan FOKUPERS, ALFLA, no seluk tan.
No iha loron 8 fulan Marsu 2018, Fokupers hahú fila fali hodi hakbesik an ba feto maluk sira iha prisao Gleno hodi halao atividade trauma healing hodi selebra loron mundial feto.
Objektivu husi aktividade ida ne’e:
- hodi hametin solidariedade, domin no ksolok ba feto maluk sira.
- Sai rona nain diak ba feto maluk sira ne’ebé mak hetan esperiensia moruk, todan iha sira-nia pasu moris.
- Bele fahe sira nia sentimentu triste, ksolok fó koragem ba malu, no sente katak ema seluk hadomi nafatin sira.
Rezultado husi aktividade hirak ne’e maka:
Feto prisioneiro sira bele hato’o sira nia sentimentu ka konta sira nia istoria ho fiar a’an. Maske ho tempo ne’ebe mak limitado maibe Fokupers konsege halo sira kontenti no bele kura sira nia sentimentu triste ka trauma ne’ebe sira iha.
Wainhira sesaun trauma healing ida ne’e remata Diretor Prisao Gleno Sr. Nito Dos Santo fo mos nia rekomendasaun katak atividade ne’ebé mak ohin Fokupers halo importante tebes ba feto maluk sira, oinsá sira bele espresa sai sira-nia sentimentu ne’ebé sira rai hela. Makse barak labele koalia sai sentimentu triste, ne’ebé mak sira sente, maibé sira hotu kontente ho atividade ne’e. Atividade ne’e presiza iha kontinuasaun la bele para deit ho loron Mundial ba Feto.
Lia fuan murak husi Prisoneira nain 4
- “Agradece tanba iha Fokupers nebe mak hadomi ami iha momentu espesial ida ne’e”
- “Ami sente kontente no forte bainhira Fokupers hala’o atividade furak ida ne’e ho ami”
- “Hau la sente mesak, ha’u sente ha’u sala no ha’u simu ona justisa no lia loos ba krime ne’ebé ha’u halo”
- “Ha’u simu kastigo tanba ha’u mak fó fatin ba feto maluk sira ne’ebé la kohi servisu buat seluk, maibé hakarak halo vida prostituisaun”
- “Ha’u mak oho hau nia laen, tanba ha’u la hetan dalan oinsa atu sai husi situasaun odio no rai odio iha ha’u nia laran”
