Fokupers Realiza Komunikadu Imprensa
Fokupers Reliza Konferensia Imprensa Data, 3/8/2023
FOKUPERS lamenta no kondena makaas deklarasaun diskriminativu hasoru feto husi Administrador Posto Lautem
Fokupers dismente, lamenta no kondena maka’as deklarasaun ho karakter diskriminativu hasoru feto husi Aministrador Posto Lautem relasiona ho preparasaun ba eleisaun suku ne’ebé fó sai husi knaal RTTL, EP iha data 2 Agusto 2023.
Deklarasaun ne’e, manifesta atitude diskriminasaun todan hasoru feto, nakonu ho esterotipu no kontra makaas norma no prinsipiu sira iha konstituisaun RDTL kona-ba naun-diskriminsaun, igualidade no universalidade, igualdade entre feto ho mane. Iha artigu 2 alinea 4 defini ho klaru katak: Estadu rekoñese no valoriza norma no lisan rai-Timór nian ne’ebé la kontra Konstituisaun no mós lejizlasaun nasional seluk tan, ne’ebé ko’alia kona-ba direitu ne’ebé mai husi lisan no toman.
Timor-Leste mós nu’udar estadu parte ba tratadu/konvensaun internasional xave sira kona-ba direitu umanus no promove igualdade jeneru iha Timor-Leste, inklui Konvensaun kona-ba Eliminasaun forma Diskriminasaun hotu-hotu Hasoru Feto (CEDAW). Tanba entidade públiku sira hotu, inklui administrator postu administrativu Lautem tenke obedese.
Hanesan hatur iha Constituicão RDTL, Artigu 16, hatete, UNIVERSALIDADE NO IGUALDADE, SIDADAUN HOTU-HOTU HANESAN IHA LEI NIA OIN NO MOS IHA DIREITU NO OBRIGASAUN HANESAN,
No artigu 17, hatete, IGUALDADE BA FETO HO MANE. FETO NO MANE IHA DIREITU HANESAN IHA MORIS FAMILIA, KULTURA, SOSIAL, EKONOMIKU NO POLITIKA NIA LARAN.
Iha Dekrete Lei no 3/2009, kona-ba Lideransa Komunitariu altera ho Lei nu. 9/2016 kona-ba Suku garante katak eleisaun Xefe Suku fó mos fatin absoluta ba feto hodi prienxe fatin ne’ebé hanesan, representante feto nain rua ou juventude feto ida hodi kompete ho mane iha eleisaun Suku nian.
Husi artigu sira no deklarasaun universal DH ne ’e ita konsiente no forte tebes partisipasaun ema hotu liu-liu feto sira nia direitu iha aspektu hotu iha vida politika hodi bele kompete ho mane sira.
Husi Informasaun iha media RTTL,EP Administradór Lautem Sr. Zaret Alda da Silva iha nia intervista hato’o katak “ tuir kultura Lautem Feto labele ukun iha Posto Lauten. Kultura Postu Lauten diferente tebes ho kultura husi Postu sira seluk iha Munisipio Lautem.”
“Ho kandidatus 10 iha Postu-Administrativu Lautem, hau husu para bele evita kandidatu feto sira ne’ebé mak hakarak kandidata nia-aan, tanba atravesa kultura ne’ebe postu Lauten la eziste para feto atu sai ukun nain iha suku 10. Hau husu toma atensaun ba ida ne’e.”
Fokupers konsidera stementu ne’e hamate feto sira nia direitu, feto nia kapasidade, la valóriza no kontinua diskrimina feto hodi tau nafatin feto iha segundo lugar.
Fokupers respeita kultura Timor-Leste ne’ebe iha valóres importantes ne’ebé tane-aas dignidade familia nian, maibe laos hatur hodi hamate feto nia partisipasaun no desizaun iha vida politika, moris sosial no kultura.
Ho nune’e Fokupers kontra makas asaun no statementu nebe’e fó sai husi Administradór Postu-Administrativu Lautem ne’ebé deskrimina no la valoriza feto nia partisipasaun iha vida politika.
Ikus liu, FOKUPERS hakarak apresia Feto sira nia matenek, kapasidade, enkoraja feto hotu-hotu liu feto husi Munisipio Lautém atu ezerse sira nia matnek no kapasidade ba desenvolvimentu Nasaun Timer-Leste.