*Ivonia Adão Matilde, Husi Munisipiu Covalima*

Importante tebes ba feto ida atu moris ho mehi ba saida mak nia hakarak rasik ba nia-aan iha futuru. Violénsia ne’ebé hasoru iha moris sai hanesan esperiensia no motivasaun ba moris, katak feto mós bele hamrik husi nia liman no ain rasik hodi bele jere nia ekonómia no la depende ekonomia ba mane, tamba feto sei sai nafatin vitima ba poder dominante husi mane no mós komunidade ne’ebé ignora feto nia kapasidade.

Situasaun hirak ne’e sei akontese ba maluk balun ne’ebé hela iha área rural, espasu ne’ebé klot, susar atu hetan dollar ida, maibe laos katak susar la iha rohan, sei iha dalan oinsá atu hamenus susar ne’e.

Ivonia ho idade 39, kaben na’in (divorsiu), iha oan na’in neen, husi Munisípiu Covalima. Ho abilidade ne’ebé nia iha, nia hetan solusaun ne’ebé bele fó oportunidade ba nia, hodi hetan rendimentu ba nia moris.

Antes tuir treinamentu no involve iha grupu, Mana Ivonia sempre hetan difikuldade, moris hanesan iha nakukun laran, wainhira osan laiha, halai tun sa sa’e de’it hodi empresta osan, servisu loron-loron mak iha dapur de’it. Nia-kaben la fó lisensa atu mana Ivonia tuir treinamentu sira, hakarak mak haree labarik no halo servisu dapur nian de’it,

“Uluk ha’u seidauk tuir treinamentu, ha’u senti iha difikuldade, tanba bainhira atu presiza importante ruma, ha’u atu foti osan ha’u tenki la’o tun sa’e ba foti osan iha banku. Ha’u atu servisu iha liur katuas-oan la fó lisensa, ha’u nia dever mak kuida labarik iha uma no halo servisu dapur nian de’it.” Hateten Mana Ivonia.

Iha fulan Fevereiru 2024, Mana Ivonia tuir treinamentu kona-ba kuida famlia, Jestaun Finanseiru no Abilidade Moris. Hafoin de tuir treinamentu, nia komprende, no iha ona koñesimentu katak, feto la’os servisu iha dapur de’it, la’os kuida labarik de’it, maibé feto iha direitu foti desizaun, hodi halo servisu sira hanesan, buka osan, loke negosiu no kria grupu.

“Bainhira Programa World Vision tama iha ami nia suku, hau hetan oportunidade tuir treinamentu, kona-ba oinsa Jere osan, igualdade jéneru (feto-mane servisu hanesan de’it), katak, la’os mane de’it mak hatene buka osan, maibé feto mós bele buka osan, bele sai lideransa iha grupu, só diferente sexu de’it. Servisu hotu feto-mane bele halo hotu, feto mós iha abilidade buka osan, mane mós bele tein, fase roupa no hein labarik. Ha’u tuir tiha treinamentu ne’e, senti hau nia moris iha mudansa, maske hau ho katuas-oan fahe malu, maibé ha’u forte hodi halo servisu, la’os dependensia ba mane de’it.” Tenik, mana Ivonia.

Hafoin tuir treinamentu husi World Vision, Mana Ivonia ho nia kolega sira haríi grupu rua, ida mak Grupu Poupansa, Ivonia nia pozisaun hanesan Sekretaria. Grupu ne’e foku liu ba Rai no Empresta Osan, no sira iha membru hamutuk na’in 30, (F:26 M:4). Iha Grupu Produsaun, haree liu ba agrikultura nian, Mana Ivonia sai hanesan xefe grupu ho membru hamutuk na’in 16.

“Iha Grupu Poupansa, ami tau hamutuk osan, ema ida hatama $ 5.00, no masimu $ 25.00 kada fulan osan sira ne’e, ami tau hamutuk, no bainhira membru sira presiza urjenti, hanesan halo negosiu no selu oan nia eskola, bele foti no empresta. Karik ema ruma hakarak empresta tenki iha nia funan, no agora dadaun hetan ona lukru $ 1000.” Informa mana Ivonia.

Benefísiu husi programa World Vision nian ne’e, mak Mana Ivonia, hatene ona Jere osan. Agora dadaun nia halo hela dosi no suku pasta ba fa’an. Nia sente nia moris ne’e iha mudansa boot, no nia esperansa ba oin, hakarak halo uma hodi hela no selu oan sira nia eskola, tanba oan nia futuru importante liu ba nia.

“Ha’u agredese ba Word Vision ba projetu EU_POWER, ne’ebé hetan apoiu fundus husi Uniaun Europeia. Programa ne’e ajuda tebes ha’u, halo mudansa ba ha’u nia moris no halo hau brani foti risku. Se momentu ne’eba mak ha’u la tuir treinamentu husi World Vision karik, ha’u lahatene, ha’u nia moris ne’e sai oinsa. Agradese mós ba Fokupers ne’ebé mai lori ami nia lian/istória hodi hatudu ba mundu katak, la’os mane de’it mak hatene buka osan, maibé feto mós bele.” Dehan, Ivonia.

“Husu ba feto maluk sira iha teritóriu Timor laran, labele depedensia liu ba mane, hanesan feto tenki forsa nafatin, foti desizaun ba aan rasik. Aproveita oportunidade sira ne’ebé implementa husi organizasaun nasionál no internasionál sira, liuliu treinamentu sira ne’ebé mak oferese ba ita, ne’e ajuda tebes ita, guia ita, aumenta ita nia abilidade, habrani ita, labele tauk foti risku ba ita nia-aan.” Apela mana Ivonia.

Projetu POWER finansia hosi Uniaun Europeia (UE) no implementa husi World Vision, FOKUPERS no FEEO, iha Oe-cusse no Covalima, hodi apoia Promove Feto Liuhusi Empoderamentu Ekonómia no Direitu.

Hakbi’it Koñesimentu Transforma Mana Ivonia ba Moris Di’ak