Fokupers realiza Treinamentu Auditoría Sosial ho Prespetiva Jéneru iha Oe-Cusse

Foto hamutuk Fasilitadóra Fokupers ho Partisipantes sira hafoin de treinamentu

Oe-Cusse,15-17 Agostu 2024, Fokupers realiza aktividade Treinamentu kona-ba Auditoría Sosial ho Prespetiva Jéneru ba Komunidade Edukativu, Diretóres da Eskola, Lider Komunitariu, Professores, alunus no mós Organizasaun Sosiedade Sivil sira iha Municipio Oe-Cusse, ne’ebé halao  iha salaun Erihjocia Padimau, ho  total partisipante ema na’in 28, (feto 13 no  mane 15).

Objetivu husi treinamentu ne’e mak, atu hasa’e ema nia koñesimentu kona-ba Auditoría Sosial ho Perspectiva Jenerú atu partisipante sira iha konsiénsia hodi responde no prevene violénsia Bazeia ba jenerú iha nível eskola.  

Parte seluk husi objetivu atu komunidade edukativu husi eskola 4 hanesan, EBC Mahata, EBC-Meco Cicalote, Eskola Tekniku Vokasional  (⁠ETV) Palaban, no Escola Secundaria Tekniku Vokasional Agrikola Etakaroxago (⁠ESTEVA) bele iha sensibilidade kona-ba asuntu violénsia bazeia ba jenerú (VBJ) no sai autór ba mudansa iha sira nia Munisipiu inklui iha eskola sira.

Foto: Partisipantes sira deskobre ka dezeña ai-hun problema, haree tipu Violénsia, kazu no abut husi Violénsia

 Treinamentu ne’e nu’udar pasu importante atu partisipantes sira uza ho di’ak materia sira ne’ebé fornese hodi tau iha prátika ne’ebé laiha diferensa entre feto no mane iha moris sosial, kultura no familia nia laran. Importansia seluk maka, oinsa lori partisipantes atu deskobre aktus violénsia ne’ebé akontese tantu iha familia, komunidade no sosiedade nia laran, liu husi deskobrimentu ne’ebé partisipante sira deseña husi Ai-hun problema, haree tipu violénsia, kauza no abut husi violénsia. Deskobre katak, violénsia ne’e mosu tanba deigualdade jenerú no kultura ne’ebé fo kbi’it ba mane sira foti desizaun.

Importansia seluk husi treinamentu ne’e maka partsipantes sai na’in ba Auditória Sosial nu’udar prosesu ida ne’ebé apoia sidadaun sira hodi monitoriza Governu nia servisu hodi garante katak, desenvolvimentu nasionál fó benefisiu ba ema hotu no mantein diálogu ho parte interesada sira husi komunidade, sosiedade sivil no Governo hodi fahe opiniaun kona-ba Governo nia prestasaun servisu.

Partisipante sira mós dezeña mapamentu hodi haree ba potensia rekursus ne’ebé iha, desafius, no problema sosiál  sira, liu-liu liga ho infrastutura,  fasilidade saneamentu bee-moos,  fasilidades publiku sira ne’ebé mak eziste iha Munisipio Oe-Cusse, hodi sai hanesan rekomendasaun ba Governo ba implementasaun programa ka projektu sira hodi identifika asaun ne’ebé nesesáriu atu hadia di’ak liu prestasaun servisu sira ba iha Boa Governasaun, hatene  halo advokasia hodi garante katak, Orsamentu Geral  Estadu (OGE) bele fó benefisio no ema hotu-hotu, liu-liu feto sira hola parte iha desenvolvimentu Nasional.

Atividade ne’e hetan apoiu Fundus husi Governu liuhusi Gabinete Apoio Sosiedade Sivil (GASC).