Fokupers Audiénsia ho Komisaun F no GMPTL kona-ba OSJ iha OJE liga ho Servisu Integradu husi provizaun servisu ba violénsia bazeia jéneru tuir PAN-VBJ
Fokupers audiénsia ho Komisaun F ho GMPTL. Foto: Lensa Fokupers
Dili, 28 Maiu no 4 Juñu 2024, Fokupers halo Audiensia ho Komisaun F no Grupo das Mulheres Parlamentares de Timor-Leste (GMPTL). Iha audiensia ne’e Fokupers hato’o kona-ba servisu apoiu integradu sira ne’ebé durante ne’e Fokupers fornese ba sovrevivente violénsia bazeia ba jéneru ne’ebé mai iha Fokupers no hela provizoriamente iha Uma-Mahon. Fokupers mós aprezenta lakuñas sira ne’ebé Fokupers no Uma-Mahon sira hotu hasoru iha servisu apoiu sira ba sobrevivente violénsia bazeia jéneru, ne’ebé implika ba implementasaun no atinjimentu objetivu sira iha PAN VBJ.
Intervensaun servisu Fokupers nian no mós Uma Mahon sira, kontribui ba Planu Asaun Nasionál Violénsia Bazeia ba Jéneru (PAN-VBJ) Pillar I Prevensaun violénsia hasoru feto no labarik feto, pillar II ba provizaun servisu esensial ba Feto no labarik vitima VBJ.
Aleinde informa kona-ba servisu apoiu integradu husi Uma-Mahon sira ba vitima violénsia bazeia ba jéneru, Audiénsia ida-ne’e liga mós ho difikuldade ne’ebé uma-mahon sira hasoru sira husi alokasaun Orsamentu Estadu ne’ebé hetan redusaun ba provizaun servisu sira bazeia ba PAN-VBJ nian, iha tinan 2024. Orsamentu ne’ebé alokadu ba Instituisaun Solidariedade Sosial(ISS) iha OJE 2024 hamutuk $1,400,000.00, no Ministeriu Solidariedade Sosial no Inkluzaun (MSSI) halo ezersisiu hodi aloka orsamentu refere ba ISS hamutuk 30 ne’ebé mak rejistadu iha MSSI. Nune’e iha tinan 2024 ne’e, orsamentu ba Uma-mahon hetan redusaun. Fokupers preokupa no konsidera katak, alokasaun orsamentu ba Uma-Mahon sira la adekuadu atu hatan ba PAN-VBJ ninia implementasaun tanba kada tinan orsamentu ba Uma Mahon hetan tan redusaun.
Nune’e, Fokupers realsa mós atu konsidera alokasaun orsamentu ne’ebé bazeia ba tipu utilizasaun ISS no nesesidade ho tratamentu ne’ebé mak diferente ba uma-mahon sira ne’ebé fornese provizaun servisu ba sobrevivente VBJ ho ISS sira seluk hanesan sentrú komunitariu no mós orfonatu sira, atu bele fornese servisu apoiu integradu tuir PAN-VBJ ho di’ak liután
Entretantu, iha enkontru ne’e, ko’alia mós kona-ba Rezultadu Avaliasaun iha eskola kona-ba Mekanizmu Refreal iha eskola ba Violensia bazeia ba Jéneru no prosesu fila hikas ba eskola ho ninia rekomendasaun atu eskola sai fatin ne’ebé seguru ba estudante sira atu bele ko’alia kona-ba esperiensia asédiu seksuál no VBJ iha eskola, oinsá mekanizmu referál atu asegura politika fila-hikas ba eskola ba vítima VBJ. Asegura mós eskola bele iha fatin espesifiku ba estudantes sira no manorin ne’ebé treinadu nune’e estudantes sira senti konfortável hodi koalia sai.
Nune’e, Iha ambitu Orsamentu Jeral Estadu (OJE) 2025, Fokupers halo audiensia ho Komisaun F nomós GMPTL, nu’udar meius advokasia ida atu asegura OJE 2025 nian, Sensivél ba Jéneru liuliu asegura planu implementasaun PAN-VBJ, asegura mós MSS no Ministeriu Edukasaun atu bele konsidera orsamentu 2025 nian, ba provizaun servisu sira apoiu ba ba Sobrevivente VBJ nomós prevensaun ninian.
Komisaun F ho GMPTL, apresia no kontenti bele halo audiensia ho Fokupers, no pronunsia husi Presidente Komisaun F katak, sei realsa asuntu ida ne’e hato’o iha rekomendasaun ba Ministeriu Solidariedade Sosiál. Rohan husi sorumutu ne’e mak Fokupers sei prepara relatóriu eskrita ho dadus husi fornesementu servisu sira ne’ebé durante ne’e halo husi Uma-Mahon no benefisiariu sira, atu bele fasilita di’ak liután ba deputada/u sira hodi tau iha konsiderasaun bainhira debate OJE ba tinan 2025 iha Parlamentu Nasional.