MSSI selebra akordu kooperasaun ho ISS 30 inklui Fokupers
Fokupers asina akordu ho MSSI, Foto: Lensa Fokupers
Dili, 18 Juñu 2023: Ministériu Solidariedade Sosiál no Inkluzaun (MSSI) hala’o asina akordu kooperasaun ho Instituisoens Solidariedade Sosiál (ISS) inklui Fokupers ne’ebé durante ne’e hatutan hela servisu MSSI nian no hetan ona direitu ba utilidade sosiál hodi atende ba benefisiáriu sira hanesan ema ho defisiénsia, vítima violénsia domestika no violénsia bazeia ba jéneru, vítima ba labarik no feto, no seluk tan.
Objetivu husi asina akordu ne’e, tanba ISS reprezenta governu liu husi MSSI no hanesan liman ain atu tau matan vitima sira hanesan, Feto faluk, oan-kiak, vitima ba Violénsia bajeia ba jéneru, difisiensia no seluk tan.
Total instituisoens ne’ebé hetan utilidade sosiál/apoiu orsamentu husi MSSI ba tinan 2024 mak 30 instituisoens ho ninia orsamentu US$ 1,309,453.24.
Hafoin asina tiha akordu, Ministra Solidariedade Sosiál no Inkluzaun, Verónica das Dores, apela ba ISS sira atu utiliza orsamentu ida-ne’e tuir regras, hodi tau matan ba ema vulnerável sira liuliu feto no labarik sira, liuhusi hadi’ak mekanizmu atendimentu, tanba sira presiza tebes hetan tratamentu espesiál.
“Ohin ita asina akordu ho ISS tanba Instituisaun sira ne’e reprezenta MSSI nia liman ain, atu tau matan ba vítima sira hanesan; feto faluk, oan ki’ak, ema ho difisiénsia, ferik ho katuas, no sidadaun sira ne’ebé iha situasaun vulnerábilidade, entaun instituisaun sira ne’e maka atu tau matan ba sira,” dehan, Ministra, Veronica da Dores, iha salaun MSSI, Kaikoli.
Diretór Jerál Protesaun Sosiál, Florêncio Pina Dias Gonzaga iha ninia intervensaun, husu ba ISS sira atu implementa orsamentu tuir programa ne’ebé previstu ona. Diretór Jerál ne’e mós apresia prestasaun servisu ISS sira nian, tanba mesmu iha prosesu avaliasaun todan uitoan, maibé MSSI hakarak promove transparansia iha ezekusaun orsamentu no programa sira hotu.
Foto hamutuk entre Institusaun 30 ho MSSI, Foto: Lensa Fokupers
Iha fatin hanesan, Diretóra Ezekutiva Fokupers, Domingas Afonso Amaral, Agradese tanba tinan ida ne’e kontinua hetan apoiu husi MSSI, liuhusi orsamentu subvensaun publik nian, hodi implementa programa sira.
“Tinan ne’e, ita hetan orsamentu atu kontinua nafatin presta servisu ba Feto no labarik feto vitima sira iha uma-mahon Fokupers nian, inklui uma-mahon Maria Tapo ne’ebé na’in ba Governu, maibé Fokupers mak Jere durante tinan 10 ona, entaun total orsamentu ne’ebé ita hetan husi MSSI hamutuk US$ 125,655.36.” Informa, Diretóra Ezekutiva Fokupers, Domingas Afonso Amaral.
Fokupers rejista ona hanesan ISS, ba tinan ida ne’e, apoiu ne’ebé mai husi MSSI, haree liu ba provizaun servisu, liuhusi prestasaun servisu ba Feto no labariik feto vitima sira iha uma-mahon.
“Ita kontinua fornese uma-mahon ba feto no labarik feto vitima violénsia bajeia ba jéneru, halo atividade sira hanesan, psiko-terapia, oinsa sira bele rekoopera iha trauma, kontinua fó asistensia tratamentu saúde, akomapñamentu prosesu legal, edukasaun formal no naun-formal, halo iha uma-mahon,, treinamentu abilidade moris (life skill tranning) hanesan hola parte ida prosesu terapia ka rekopera iha sira nia trauma.”Hateten, Diretóra Ezekutiva Fokupers.
Diretóra Ezekutiva, hatutan, Apoiu ida ne’e mós ba iha prosesu reintegrasaun, halo asesmentu molok reintrega. Iha prosesu reintregasaun Fokupers la servisu mesak, maibé servisu hamutuk ho pontu vokál VBJ iha MSSI nian rasik kada munisipiu.