Importantes tebes ba feto vitima ida atu moris ho mehi ba saida mak nia hakarak rasik ba nia-aan iha futuru. sei furak liu tan bainhira futuru ne’ebé nia mehi fó benefisiu mós ba ema seluk.

Feliciana Serão de Jesus Carvalho, idade 40, oan na’in 4 feto 2 mane 2, husi Likisa-Maubara, Sobrevivente VD, agora dadaun nu’udar negosiante ba restorante Tia Janner iha Maubara.

Uluk Feliciana Serão de. J. Carvalho seidauk hetan asistensia no akompañamentu husi Fokupers, hanesan vitima taka-aan mak barak liu, la brani atu koalia sai, hanoin katak, laiha ona dalan. Maibé, hetan tiha asistensia no akompañamentu husi Fokupers, bele brani ona foti desizaun, no nakloke ba ema katak, laiha ema ida moris perfeitu.

“Bainhira hetan Violénsia Domestika husi hau nia laen hau senti triste tebes, tanba nia baku sasan uma laran, baku hau, entaun hau senti ba labele ona, hanesan feen ida ne’ebé moris laiha kontenti. Entaun hau desidi di’ak liu hau fila-fali ba hau nia inan-aman. Entaun husi ne’e hau moris mesak no buka rasik halo negosiu nune’e bele tau matan ba hau nia-oan.” Haktuir, Sobrevivente, Feliciana Serão de J. Carvalho.

“Hau agradese tebes ba Fokupers tanba ho Fokupers nia asistensia no akompañamentu mai hau mak hau feto ida ne’ebé mak brani no hatudu ba ema katak, hau feto ne’ebé sobrevive husi Violénsia Domestika brani koalia sai.” Dehan, Feliciana Serão.

Feliciana, hateten, Fokupers mós fó treinamentu kona-ba Abilidade moris, Mikro-Empreza, Saude Reprodutiva, Jere Finanseira, Violénsia Bajeia ba Jeneru no seluk tan, partisipa mós iha Feira sira.

“Husi Treinamentu sira ne’e mak, loke hau nia hanoin, hau loke rasik hau nia negosiu hanesan restorante, maske hahú ho fundus ne’ebé mak ki’ik, maibé hau buka rasik loke restorante hodi jere rasik hau nia osan. Agora dadaun mós karik iha treinamentu ruma Fokupers sempre fó oportunidade mai hau, ba tuir treinamentu sira ne’ebé mak Fokupers organiza.” Akresenta, Feliciana.

Iha restorante laran ne’e Feliciana fa’an Kafé, Jus no hahan. Organizasaun ruma halo treinamentu sira sempre pesan Feliciana nia restorante, inklui Fokupers mós organiza treinamentu iha Likisa sempre pesan husi nia restorante.

“Hau halo negosiu loke restorante Tia Janner, hahú ho modal osan $ 700, hau empresta de’it hau nia maun nia osan, $ 500 dollar sosa sasan sira dapur nian.” Informa, Feliciana.

Nia esplika, husi negosiu ne’e, uluk loron ida hetan de’it $5 dollar, maibé agora ne’e loron ida bele hetan $30 dollar, sé ema pesan loron ida bele hetan $ 300.00 dollar to’o $ 600.00 dollar, loron bailet ne’e semana ida hetan $ 100.00 dollar.

Feliciana loke restorante ne’e, fó servisu ba kolega na’in rua mak servisu hamutuk ho nia, ne’ebé fulan ida ema ida hetan osan $ 100.00 dollar.

“Hau senti orgullu tanba husi Fokupers ne’ebé fó oportunidade mai hau ba tuir treinamentu mak ohin loron halo negosiu no kontinua ba oin tan. Hau agradese ba Fokupers tanba husi Fokupers mak fó Counseling, fó korajen hau, ohin loron hau bele sai kontenti no haksolok, hanesan feto brani koalia sai no foti desizaun. Sé momentu ne’e mak Fokupers laiha, dalaruma hau nia moris la sai hanesan ne’e.” agradese, Feliciana.

Sobrevive husi Violénsia Doméstika Feliciana Loke Restorante Tia Janner iha Maubara