FIAR A’AN MAKA DALAN NE’EBÉ DI’AK LIU HODI BELE SOBREVIVE

La hakfodak bainhira la’o iha area rurais, iha estrada ninin, loron manas, udan, anin no rai-rahun suar, maske iha situasaun risku nia laran, ba nia mak loron ida bele hetan dollar ida, tanba dalan ne’e duni mak nia deside. Iha esperiensia moris loron-loron hodi tama sai suku to’o fatin rural sira ho lian maka’as, Monica haktuir nia istoria  ;

“Kadeira, meza, exponza…kadeira, meza, exponza…kadeira, meza, esponza….maun-mana sosa meza, kadeira, exponza lai”.  La sente kole, hamlaha, hamrok ho sasan todan ne’ebe lori iha hau nia kaba’as, dala barak sasan ema sedauk sosa, maibé ho pasiensia no entusiasmu hau kontinua lao ain hodi fa’an sasan sira ne’e hodi tama sai uma, Suku, Aldeia to’o fatin isoladu sira”.

Monica Sequeira, idade 40,  iha oan na’in 6, feto nain 3 no mane nain 3. Nia kaben servisu hanesan Manorin na’in. Iha hari’i uma kain Monica ho nia kaben moris hamutuk ho nia kaben nia familia. Durante moris hamutuk Monica sempre hetan violensia husi nia kaben nomós nia familia. Baku, tuku, tebe no deskriminasaun, Monica mós hetan presaun psikolojika, liu tan maka laen la konsidera nu’udar fen hodi bele asegura bens estar familia hanesan jere osan husi nia kaben nia vensimentu. Nu’udar Manorin na’in ka Funsionariu Publiku vensimentu ne’ebé hetan, kada fulan nia fó de’it ba Monica ho montante $0.50. Husi osan ne’ebé nia kaben fó hodi sosa modo ba refeisaun rua, Monica koko jere ho di’ak, nia gasta $0.40 no nia rai iha fatin segredu $0.10.

“Hau nia kaben sempre baku no duni hau no halo hau nia laran moras  tebes, tamba dala ruma semana ida hau hariis dala ida, hau labele troka roupa tamba nia deskonfia hau. Iha loron ida nia baku hau to’o ran, ho nune’e hau ba kesar iha Polisia tamba hau sente katak ne’e todan tebes atu moris iha violénsia nia laran. Polisia lori hau mai hela iha Uma Mahon Fokupers, hodi hein hau nia prosesu kazu ba Tribunal to’o remata. Hau husik hau nia oan sira hamutuk ho nia no nia familia, hau rasik deside atu moris hakmatek iha tempu badak iha Uma Mahon.” Hateten, Sobrevivente Monica.

Monica dehan, Hela iha Uma Mahon, Staff sira nia prezensa suporta no hakbi’it  nia moris, nune’e nia  sente forti tebes, liu husi aprende buat barak hanesan tuir kounseling no halo atividades sira seluk.

Monica deside sai husi Uma mahon buka moris no lakohi tan moris hamutuk ho nia kaben, nia hakarak ses husi Violénsia. Nia koko hamriik mesak ho oan na’in-neen, no koko halo negosiu.

“Hau deside sai husi Uma Mahon hodi buka moris, tamba hau deside lakohi moris tan ho hau nia kaben no ses husi violensia. Hau koko hamrik mesak ho oan nain 6 ho idade mesak ki’ik. Hau nia esforsu tomak hau koko halo negosiu ho modal $20.00, husi osan ne’ebé hau halibur bainhira hau sei moris ho hau nia kaben. Osan ki’ik la to’o halo negosiu, hau foti  risku hanesan deve osan no selu tusan, hau la dezanima ho pursentu ki’ik ne’ebé manan hau rai ho di’ak, balun hau selu tusan no balun aguenta hau nia moris hamutuk ho oan sira.” Informa, Monica ho matan-been.

Nia dehan, haree nia feto maluk sira tutur sasan dapur ba fa’an tama sai ema nia uma, nia mós deside koko halo negosiu hanesan ne’e. Primeiru tutur sanan, bikan no sasan sira seluk ba fa’an iha Cailaco, la’o ain, nia husik hela  nia-oan foin maka fulan lima iha uma ho nia inan, bainhira iha lorokraik nia fila, nia ain sira bubu no moras hotu. Maske hasoru desafius maibé nia konsege hetan rendimentu no rai osan to’o $600.00.

Nia akresenta, Fokupers kontinua haree no akompaña sira nia moris, Fokupers la husik nia, bainhira iha atividade ka treinamentu sempre bolu nia partisipa, atividade sira ne’e  fó inspirasaun  no motivasaun atu nia kontinua forte hodi bele buka moris.

“Hau mós hetan apoiu fundu husi Fokupers, hanesan $100.00 hodi bele apoia tan hau nia negosiu. Problema ida foin maka hotu, foin hadia hau nia moris hau nia aman ne’ebé hau hadomi nia mós mate. Problema kultura halo hau gasta osan barak, tamba ezizensia husi hau nia kultura rasik.  Nune’e hau laiha osan atu kontinua hau nia negosiu.” Nia afirma.

Nia hatutan, Iha  tinan 2016, Fokupers fó apoiu nafatin, liu husi fundus $400.00. nia kontente no kontente tebes bele kontinua halo  nia negosiu. Hahú fali ho faan kadeira, meja no armario, tutur no kesi iha nia kabas no kanotak,  loron manas, udan, rai rahun suar la senti todan, bainhira kole maka buka ai-hun ida hodi hamahan an.

Husi dezafius hirak ne’ebé hetan iha nia moris, halo negosiu monu hamriik, ikus mai nia konsege susesu ba nia negosiu, nia kontenti tanba hetan lukru ne’ebé mak di’ak liu.

“Uluk hau lao ain, maibé agora hau aluga kareta hodi fa’an sasan husi Municipio id aba Municipio seluk, hau hetan lukru ne’ebe diak, hodi kontinua suporta hau nia oan sira nia eskola, halo uma no hadia nafatin ami nia moris.” Tenik, nia.

Sobrevivente Monica,  agradese ba Fokupers no domin bo’ot ba nia, la husi nialao mesak, nia iha mehi atu dudu nafatin nia-oan sira ba eskola atu sai ema ne’ebé matenek hodi hetan susesus iha sira nia moris atu sira labele hanesan ho nia ne’ebé moris iha violénsia. Maske todan maibé nia kontinua esforsu.

Nia mós husu ba nia feto maluk sira “ Bainhira ita halo negosiu ruma maka monu iha dalan klaran labele desanima, labele baruk, leba nafatin maske ne’e todan, nune’e ita bele hatudu ba ema seluk katak, ita feto mós bele.